🍂🖋️ "Ньурба көмүс күһүнэ" тэрээһин чэрчитинэн Убайааҥҥа Варвара Потапова улааппыт тэлгэһэтигэр Ньурба поэт кыргыттара Варвара Потапова уонна Клара Васильева сырдык ааттарыгар сүгүрүйэр, ахтан-санаан ааһар истиҥ көрсүһүү буолла. Төһө даҕаны ардах ибирдии турдар, дьон-сэргэ тоҕуоруһа муһунна. Ньурба оройуонун култуураҕа департаменын салайааччыта Розалия Тихонова, ыҥырыылаах ыалдьыттар СӨ народнай суруйааччыта Наталья Михалева – Сайа, "Күрүлгэн" сурунаал бас эрэдээктэрэ Афанасий Гуринов – Арчылан, "Ньурба уоттара" литературнай түмсүү салайааччыта Дмитрий Пономарев – Дьолуолаах, суруйааччы Михаил Санников – Уол Саарын мустубут дьоҥҥо анаан санааларын тиэртилэр, хоһоонноруттан ааҕан иһитиннэрдилэр. Ньурба поэт кыргыттара Варвара Потапова уонна Клара Васильева биһиги кэккэбитигэр баар буолуохтарын сөп этэ, кинилэр айан хаалларбыт хоһоонноро күн бүгүнүгэр диэри уостан түспэккэ хоһулла сылдьаллар диэн ахтан-санаан аастылар. Көрсүһүүнү үгэс быһыытынан Ньурбатааҕы кииннэммит бибилэтиэкэ тэрийдэ, драматическай театр артыыстара Вера Лазарева, Анисья Колесова киһи дууһатын кылын таарыйар гына аахтылар, Варвара Потапова, Клара Васильева хоһоонноругар суруллубут ырыаларынан Саргылана Семенова, Иванна Иванова тэрээһини киэргэттилэр. ✍🏻 Лена Петрова 📸 Александра Комогорцева хаартыскаҕа түһэриитэ @gazetanyurba @ulusmedia